Jumat, 13 September 2019
BUSANA JAWA PENGANTEN JAWA GAGRAG NGAYOGYAKARTA
BUSANA PENGANTEN GAGRAG NGAYOGYAKARTA
Wekdal samangke busana penganten tradisional Jawi taksih dipunlestantunaken, jalaran kayektosanipun sanajan jamanipun sampun majeng sanger, nanging menawi ngawontenaken pawiwahan palakrama, tiyang Jawi taksih remen ngginakaken busana adat tradisional Jawi. Sareh dene panganten menika asring sinebat raja saari, pramila busananipun inggih niru busananing raja. Kejawi menika keblating kabudayan Jawi menika inggih kraton. Saderengipun jaman kamardikan, upacara dhauping pnganten menapa dene busanani]pun kajumbuhaken kaliyan drajat tuwin pangkat. Jaman rumiyin ingkang ngagem busana ingkang dipunagen ing kraton inggih namung kulawarga utawi sentananing raja. Samenika jamanipun sampun ewah gingsir, busananipun kraton samenika sampun dados darbekipun masarakat. Sinten kemawon ingkang badhe krama, badhe milih corak ageman menapa kemawon sampun boten wonten pambengipun. Busana panganten gagrag Ngayogyakarta inggih menika:
1. Busana Penganten Paes Ageng
2. Busana Penganten Paes Ageng Jangan Menir
3. Busana Penganten Yogya Putri
4. Busana Penganten Kesatriyan Ageng
5. Busana Penganten Kesatriyan
1. Busana Penganten Paes Ageng
Busana Paes Ageng menika ugi dipunwastani busana basahan. Busana menika dipunagem kaliyan putra-putri Sri Sultan Hamengku Buwana wonten pawiwahan agung wonten Kraton Ngayogyakarta Hadiningrat. Busana menika dipunagem rikala Upacara Panggih inggih menika panggihipun penganten putri kaliyan penganten kakung. Jaman samenika busana kasebat dipunginakaken wonten Upacara Panggih.
2. Busana Penganten Paes Ageng Jangan Menir
Busana Paes Ageng Jangan Menir dipunagem kaliyan putra-putri Sri Sultan hamengku Buwana wonten pawiwahan agung Kraton Ngayogyakarta Hadiningrat. Busana kasebat dipunagem ngangge Upacara Boyongan, inggih menika penganten putri dipunboyong tumuju dalemipun penganten kakung sasampunipun pawiwahan agung. Wonten ing jaman samenika, busana kasebat saged dipunagem kaliyan masarakat ugi pamarentah saking kraton ugi marenaken.
3. Busana Penganten Yogya Putri
Busama Yogya Putri biyasanipun dipunagem kangge Upacara Saparan, inggih menika gangsal dinten sasampunipun Upacara Panggih. Busana penganten Yogya Putri ugi dipunwastani Busana Corak Sepasaran. Rikala jaman rumiyin, busana menika dipunagem kaliyan putra-putri Dalem rikala sanja wonten dalemipun Gubernur Walanda inggih menika dinten kaping gangsal dumugi tigang dasa gangsal sasampunipun Upacara Panggih.
4. Busana Penganten Kesatriyan Ageng
Busana Penganten Kesatriyan Ageng dipunagem rikala resepsi wonten pawiwahan. Busana Kesatriyan Ageng nggadhahi sipat radi resmi. Busana kasebat ugi dipunagem kaliyan Ngarsa Dalem kaliyan putra-putri Pangeran wonten ing surya kaping 20 dalu wulan Maulud. Busana Penganten Kesatriyan Ageng ugi dipunwastani Busana Malem Selikuran.
5. Busana Penganten Kesatriyan
Busana Penganten Kesatriyan dipunagem rikala resepsi wonten pawiwahan. Busana menika busana ingkang paling prasaja ugi nggadhahi sipat boten resmi. Busana menika dipunagem kangge Upacara Boyongan.
sumber: https://regitajune97.wordpress.com/2015/02/28/busana-pengantin-tradisional-yogyakarta/.
Langganan:
Posting Komentar (Atom)
Tidak ada komentar:
Posting Komentar